NET தேசியத் தகுதித் தேர்வு

முதுநிலை பட்டப் படிப்பு முடித்தவர்கள், கல்லூரிகளில் விரிவுரையாளர்கள் பணிக்குத் தகுதியடைவதற்கும் (Lectureship), முனைவர் ஆய்வுப் பட்டப் படிப்புக்குத் தகுதியுடையவர், இளநிலை ஆராய்ச்சியாளர் (Junior Research Fellowship) ஆவதற்கும் பல்கலைக் கழக மாணியக்குழுவால் (UGC - University Grants Commission) நடத்தப்படும் தேர்வு NET - National Eligibility Test.

கலைப் பிரிவுகளில் முதுநிலைப் பட்டப்படிப்பு முடித்தவர்களுக்கான தேர்வுகளை பல்கலைக் கழக மாணியக்குழு நடத்துகிறது. அறிவியல் பொறியியல் பிரிவுகளில் முதுநிலைப் பட்டப்படிப்பு படித்தவர்களுக்கான தேர்வை பல்கலைக் கழக மாணியக்குழுவும், அறிவியல் மற்றும் தொழிலக ஆய்வு மன்றமும் (CSIR - Council of Scientific and Industrial Research) இணைந்து நடத்துகிறது. 

விரிவுரையாளர் பதவிக்கு மட்டுமான தேர்வை எழுத வயது வரம்பு இல்லை. JRF தேர்வை எழுத பொது பிரிவினருக்கு வயது வரம்பு 28 ஆண்டுகள். தாழ்த்தப்பட்ட, பழங்குடியினர், இதர பிற்படுத்தப்பட்ட வகுப்பினர், மாற்றுத் திறனாளிகள், பெண்கள் ஆகியோருக்கு மேலும் 5 ஆண்டுகள் வயதுவரம்பில் தளர்ச்சி உண்டு. தாழ்த்தப்பட்ட, பழங்குடியினர், இதர பிற்படுத்தப்பட்ட வகுப்பினர், மாற்றுத் திறனாளிகள் அதற்குரிய சான்றுகளை விண்ணப்பத்துடன் இணைக்க வேண்டும்.

முதுநிலைப் பட்டப் படிப்பை முடித்தவர்கள், முதுநிலைப் பட்டப்படிப்பில் இரண்டாம் ஆண்டு படித்துக்கொண்டிருக்கும் மாணவர்கள், அவர்களது முதுநிலைப் பாடப்பிரிவு, துறையில் இந்த தேர்வை எழுதத் தகுதியுடையவர்கள். முதுநிலைப் படிப்பில் 55% மதிப்பெண்ணிற்கும் மேல் தேர்ச்சி பெற்றிருக்க வேண்டும். தாழ்த்தப்பட்ட, பழங்குடியின வகுப்பினர், மாற்றுத் திறனாளிகள்  50% மதிப்பெண்களுடன் தேர்ச்சி பெற்றிருக்க வேண்டும். 

UGC-NET:

UGC-NET தேர்வுக்கு http://ugcnetonline.in என்ற முகவரியில் இணைய வழியில் பதிவு செய்யலாம். பொதுப் பிரிவினருக்கு கட்டணம் 450 ரூபாயும், இதர பிற்படுத்தப்பட்ட வகுப்பினருக்கு 225 ரூபாயும், தாழ்த்தப்பட்ட, பிற்படுத்தப்பட்ட, பழங்குடியின வகுப்பினருக்கு 110 ரூபாயும் கட்டணம். வங்கியில் பணம் செலுத்திய ரசீதையும், இணைய வழியில் பதிவு செய்த விண்ணப்பத்தையும் அச்செடுத்து, தேர்வர் தேர்ந்தெடுத்திருக்கும் தேர்வு மையம் உள்ள பல்கலைக் கழகத்திற்கும் அஞ்சல் மூலம் அனுப்ப வேண்டும்.

ஓர் ஆண்டில் இரண்டு முறை இத்தேர்வுகள் நடத்தப்படும். ஜூன் மாதத்தில் ஒரு முறையும் டிசம்பர் மாதத்தில் ஒரு முறையும் நடைபெறும். அந்த மாதங்களின் இறுதி ஞாயிற்றுக் கிழமையன்று தேர்வுகள் நடைபெறும்.

இத்தேர்வுகள் மூன்று தாள்களைக் கொண்டிருக்கும். எல்லாத் தேர்வுகளுமே சரியான விடையைத் தேர்ந்தெடுக்கும் கொள்குறி வினா வகையைக் கொண்டவை. தாள்-I மற்றும் தாள்-II ஒவ்வொன்றும் நூறு மதிப்பெண்களைக் கொண்டவை, ஒவ்வொரு தாளுக்கும் கால அளவு 75 நிமிடங்கள். முதல் தாளில் 60 வினாக்களில் இருந்து 50 வினாக்களுக்கு விடையளிக்க வேண்டும். இரண்டாம் தாளில் 50 வினாக்களுக்குமே விடையளிக்க வேண்டும்.  மூன்றாவது தாள் 150 மதிப்பெண்கள் கொண்டவை. இத்தாள் 75 வினாக்கள் கொண்டது, அனைத்துக் கேள்விகளுக்கும் விடையளிக்க வேண்டும். இதற்கான கால அளவு 150 நிமிடங்கள். முதல் தாள் தேர்வரின் திறனறி சோதனை மற்றும் ஆராய்ச்சி அடிப்படை முறைகள் ஆகியவற்றை அடிப்படையாகக் கொண்டது. இரண்டாம் மூன்றாம் தாள் தேர்வர் தேர்ந்தெடுத்த பாடங்களை அடிப்படையாகக் கொன்டது. தவறான விடைகளுக்கு மதிப்பெண்கள் குறைக்கப்படுவது கிடையாது.

தேர்ச்சிக்கான மதிப்பெண் அடிப்படை:

ஒவ்வொரு பாடத்திலும், பிரிவிலும் முதல் 15% இடங்களைப் பெறும் தேர்வர்கள் மட்டுமே விரிவுரையாளர் பணிக்குத் தகுதியுடையவர்களாக அறிவிக்கப்படுவார்கள். 

இதற்கு முன்பு கட்டுரை வடிவில் பதிலளிக்க வேண்டியிருந்த மூன்றாம் தாளும் இப்போது கொள்குறி வினா வகைக்கு மாற்றப்பட்டுள்ளது, அதே போல Negative Mark எனப்படும் தவறான விடைகளுக்கு மதிப்பெண் குறைக்கும் பழக்கம் இல்லாததால், அனைத்துக் கேள்விகளுக்கும் தெளிவாக யோசித்து, நிதானமாகவே பதிலளிக்கலாம், நேரமும்  தாராளமாகவே இருக்கிறது. ஒரு வினாவுக்கு இரண்டு நிமிடங்கள் வரை கால அவகாசம் உள்ளது. 

CSIR UGC-NET :

இத்தேர்வுக்கு விண்ணப்பிக்க இணைய வழியில் http://csirhrdg.res.in இந்த தளத்தில் விண்னப்பிக்கலாம். சென்னை, கோவை, திருச்சி, மதுரை, நெல்லை ஆகிய இடங்களில் உள்ள இந்தியன் வங்கியிலிருந்து விண்ணப்பங்களைப் பெற்றுக்கொள்ளலாம். அல்லது விபிபி  மூலம் பெற்றுக்கொள்ளலாம். பொதுப் பிரிவினருக்கு 400 ரூபாய் கட்டணமும், இதர பிற்படுத்தப்பட்ட வகுப்பினருக்கு 200 ரூபாயும், தாழ்த்தப்பட்ட, பழங்குடியின வகுப்பினர் மற்றும் மாற்றுத் திறனாளிகளுக்கு 100 ரூபாயும் கட்டணம் விதிக்கப்படுகிறது.

200 ம்திப்பெண்களைக் கொண்ட தேர்வுத்தாள் Part- A, Part- B, Part- C என்ற மூன்று பிரிவைக் கொன்டுள்ளது. எல்லாப் பாடங்களும் Part- A பொதுவானது, இப்பிரிவில் பொது அறிவியல், திறனறிதல், ஆராய்ச்சி அடிப்படைகள் தொடர்பான கேல்விகள் இருக்கும். கேட்கப்பட்டிருக்கும் 20 கேள்விகளிலிருந்து 15 கேள்விகளுக்கு விடையளிக்க வேண்டும். Part- Bயில் தேர்வரது விருப்பத் தேர்வில் இருந்து 50 கேள்விகள் இருக்கும், அவற்றில் 35 கேள்விகளுக்கு பதிலளிக்க வேன்டும். இவ்விரு பிரிவிலும் எல்லாக் கேள்விகளும் இரண்டு மதிப்பெண்கள் கொண்டவை. Part- C பிரிவில், விருப்பத் தேர்வில் இருந்து உயர்நிலைக் கேள்விகள் இடம்பெறும். அறிவியல் கோட்பாடுகளை, கேட்கப்பட்டிருக்கும் சிக்கல்களில் பயன்படுத்தி தீர்வு கானும் விதமான கேள்விகள் இருக்கும். கேட்கப்பட்டிருக்கும் 75 கேள்விகளில் 50 கேள்விகளுக்கு விடையளிக்கப்பட வேன்டும். ஒவ்வொரு கேள்வியும் நான்கு மதிப்பெண்களைக் கொண்டது. எல்லாப் பிரிவுகளிலும் தவறான விடைகளுக்கு 25% மதிப்பெண் கழிக்கப்படும். 

SLET/SET:

பல்கலைக்கழகங்களுக்கு இடையேயான வேறுபாட்டால், தேசிய அளவில் கல்லூரி பேராசிரியர்களுக்கு தகுதித் தேர்வு நடத்துவது அனைத்துப் பாடங்களையும் பிரதிநிதித்துவப்படுத்த போதாது என்பதால் UGC, ஒவ்வொரு மாநிலத்திலும் கல்லூரி பேராசிரியர்களுக்கான தகுதித் தேர்வை நடத்த SLET அல்லது SET (State level eligibility test) தேர்வு நடத்தப்படுகிறது. இத்தேர்வின் அமைப்பு பாடத்திட்டம் அனைத்தும் NET தேர்வையே ஒத்தது.

ப்ளஸ் 1ல் எந்த க்ரூப் எடுக்கலாம்?

பத்தாம் வகுப்புக்குப் பிறகு, மேல்நிலைப் பள்ளிக்கு அடியெடுத்து வைக்கும் மாணவர்களுக்கு எழும் முதல் கேள்வி... ப்ளஸ் 1-ல் என்ன க்ரூப் எடுக்கலாம்?

'அப்பா அந்த க்ரூப் எடுக்கச் சொன்னார்’, 'அம்மாதான் இந்த க்ரூப் எடுத்தா நல்லதுன்னு சொன்னாங்க’, 'என் ஃப்ரெண்ட்ஸ் எல்லாரும் எடுக்கிறதாலே இதே க்ரூப்பை நான் எடுக்கிறேன்’, 'என் மார்க்குக்கு இந்த க்ரூப்தான் கிடைச்சுது’, 'என்னோட டீச்சர் சொன்னதால் இந்த க்ரூப்பை எடுக்கிறேன்’.

ப்ளஸ் 1 சேரும் மாணவர்கள் பலரும் தங்களது க்ரூப்பைத் தேர்ந்தெடுத்ததற்கு இது போன்ற காரணங்களையே சொல்கின்றனர். அவர்களில் பலரும் சில மாதங்கள் கழித்து, 'அய்யய்யோ, அந்த க்ரூப்பை எடுத்து இருக்கலாமே!’, 'இந்த க்ரூப் எடுத்திருந்தால் நல்லா இருந்திருக்குமே' என்று புலம்புவதும் உண்டு. இத்தகைய நிலைக்கு ஆளாகாமல், உங்களுக்கும் உங்கள் இலக்குகளுக்கும் பொருத்தமான க்ரூப்பைத் தேர்ந்தெடுப்பதற்கு வழிகாட்டவே இந்தச் சிறப்புப் பக்கங்கள்...

பல துறைகளில் சாதிக்கலாம்!

கணிதத்திலும் அறிவியலிலும் அதிகமான ஆர்வம் இருக்கிறதா? நீங்கள் 'டிக்' செய்ய வேண்டியது ஃபர்ஸ்ட் க்ரூப் (Group- I).

கணிதம், இயற்பியல், வேதியியல் ஆகிய பாடங்களைக்கொண்டது ஃபர்ஸ்ட் க்ரூப். இந்தப் பிரிவில் உயிரியல், கம்ப்யூட்டர் சயின்ஸ், புள்ளியியல், பயோ-கெமிஸ்ட்ரி, இங்கிலீஷ் ஃபார் கம்யூனிகேஷன், ஹோம் சயின்ஸ் ஆகிய பாடங்களில் ஏதாவது ஒன்றை விருப்பப் பாடமாகத் தேர்வுசெய்யலாம். இந்த விருப்பப் பாடங்கள், பள்ளிகளுக்குப் பள்ளி மாறுபட்டு இருக்கலாம்.

ஃபர்ஸ்ட் க்ரூப்பைத் தேர்ந்தெடுக்கும் முன் கவனத்தில்கொள்ள வேண்டியவைபற்றி, நெல்லை மாவட்டம் - இலத்தூரில் உள்ள லெட்சுமி ஹரிஹர பள்ளியின் ஆசிரியர், எஸ்.சரவணபெருமாள் கூறும்போது, ''ஃபர்ஸ்ட் க்ரூப் எடுத்தால்தான் நமக்கு நல்ல மதிப்பு கிடைக்கும் என்ற எண்ணம் மாணவர்கள் மத்தியில் உள்ளது. அது தவறு. எந்த க்ரூப்பைத் தேர்ந்தெடுப்பதாக இருந்தாலும், அதில் உள்ள பாடங்களையும், அதைப் படிப்பதால் என்ன பயன் என்பதையும்தான் கருத்தில்கொள்ள வேண்டும்.

பொதுவாக, பத்தாம் வகுப்பின் ஒட்டுமொத்தமாக அதிக மதிப்பெண்கள் எடுத்தவர்களுக்கே இந்த க்ரூப்பை பள்ளி ஒதுக்கும். பள்ளியில் தருகிறார்களே என்பதற்காக அல்லாமல், கணக்கு மற்றும் அறிவியல் ஆகிய பாடங்களில் மிகுதியான ஆர்வமும், அதிக ஈடுபாடும் இருந்தால் மட்டுமே இதைத் தேர்வுசெய்ய வேண்டும். இந்த இரு பாடங்களின் அடிப்படையான விஷயங்களை முழுமையாகத் தெரிந்துவைத்திருக்க வேண்டும். அப்போதுதான், இந்தப் பிரிவில் சிறந்து விளங்க முடியும்.

நீங்கள் இதுவரை உங்கள் ஆசிரியரையே சார்ந்து படித்து வந்திருப்பீர்கள். மேல்நிலைப் பள்ளிக் கல்வியைப் பொறுத்தவரையில், ஆசிரியர் என்பவர் வழிகாட்டுதலை வழங்குபவர் மட்டுமே. உங்களின் பங்குதான் அதிகமாக இருக்கும். எனவே, உங்களது க்ரூப்பைத் தேர்ந்தெடுக்கும் முன், அதில் உள்ள பாடங்களைப் பற்றிய அடிப்படையைத் தெரிந்துகொள்ளுங்கள்.

உயிரியலை விருப்பப் பாடமாகக் கொண்டு, ஃபர்ஸ்ட் க்ரூப்பை எடுத்து, ப்ளஸ்-2 தேர்வில் நல்ல மதிப்பெண்கள் பெற்றால், மருத்துவ மற்றும் பொறியியல் இரண்டிலும் சாதிக்கலாம். இதைத் தவிர மற்ற விருப்பப் பாடங்களுடன் இந்த க்ரூப்பைத் தேர்ந்தெடுத்தால், பொறியியல் மட்டுமின்றி, கெமிக்கல், அணுசக்தி, விண்வெளி, மென்பொருள், கட்டடக் கலை, கடல்சார் படிப்பு, கணிதம் மற்றும் அறிவியல் சார்ந்த இளங்கலைப் படிப்புகள் என எந்தத் துறையிலும் நீங்கள் வெற்றியாளராக வலம்வர முடியும்.

தமிழ்வழி படிக்கும் மாணவர்களிடம் இருக்கும் ஒரே பின்னடைவு... ஆங்கிலத்தில் சரளமாகப் பேச இயலாததுதான். தாய்மொழியில் பாடங்களைப் படிப்பதால், உங்களுக்குத் துறை சார்ந்த சிந்தனையும் படைப்பாற்றலும் மிகுதியாக இருக்கும். ஆனால், உங்களில் பலருக்கும் மனதில் உள்ளதை ஆங்கிலத்தில் சொல்வதில் தயக்கம் இருக்கலாம். ஆரம்பத்தில் இருந்தே முறையான பயிற்சிகள் இருந்தால், ப்ளஸ் -2 முடிக்கும்போது கம்யூனிகேஷனிலும் அசத்தத் தொடங்குவீர்கள். இது, ஃபர்ஸ்ட் க்ரூப் தேர்ந்தெடுப்பவர்களுக்கு மட்டுமல்ல; அனைவருக்குமே மிகவும் முக்கியமானது'' என்கிறார் சரவண பெருமாள்.

கணினி வழிக் கல்வி-கைப்பணத்தில் கிராமத்து ஆசிரியர் சேவை

புதுக்குடியிருப்பு ஊராட்சி ஒன்றிய தொடக்கப்பள்ளியில் ஒன்று முதல் ஐந்து வகுப்புகளில், 66 மாணவர்கள் படிக்கின்றனர். இதில் கூலி வேலை செய்வோரின் குழந்தைகள் அதிகம். தலைமை ஆசிரியர் லாரன்ஸ் முயற்சியால், கணினி மூலம் கல்வி கற்கின்றனர். 

விவசாய பல்கலையில் மே 6 முதல் இளநிலை சேர்க்கை துவக்கம்

கோயம்பத்தூரில் உள்ள தமிழ்நாடு விவசாய பல்கலைக்கழகத்தில் இளநிலை பட்டப் படிப்பில் சேர மே 6 முதல் விண்ணப்பங்கள் வழங்கப்படுகின்றது.

விற்பனைக்கு வரும் தனியார் கல்லூரிகள்

கோவை: தமிழகத்தில், குறிப்பாக கோவை பிராந்தியத்தில், பல கல்லூரிகள் விற்பனை செய்யப்படவுள்ளன. இவற்றில் பெரும்பாலானவை பொறியியல் கல்லூரிகள். மாணவர் பற்றாக்குறையே இதற்கான முக்கிய காரணமாக கூறப்படுகிறது.

கல்விக்கு முக்கியம் எது ?

பள்ளிகளில் பாட முறை மாறிக் கொண்டே இருப்பதால் மாணவர்கள் மற்றும் பெற்றோர் மத்தியில் பல குழப்பங்கள் ஏற்பட்டுள்ளன. இதனால், பெற்றோர்களுக்கு தங்களது பிள்ளைகளை எந்த பள்ளியில் சேர்ப்பது என்பதில் குழப்பம் ஏற்பட்டுள்ளது.